ပုဇွန်ထုပ်ဆီပြန်

ပါဝင်တဲ့ပစ္စည်းများ ပုဇွန်ထုပ် ၅ကောင် ဆီ ၄ဇွန်း ကြက်သွန်နီ ၁လုံး ကြက်သွန်ဖြူ ၂မွှာ ခရမ်းချဉ်သီး ၁လုံး ငရုပ်စိမ်းမှုန့် ဇွန်းသေး၁ဇွန်း နနွင်း အနည်းငယ် ဆား အနည်းငယ် အချိုမှုန့် အနည်းငယ် ငံပြာရည် အနည်းငယ် မဆလာ အနည်းငယ်

ဒီတာ့ခါတော့ထမင်းဝိုင်း မပြင်ခင်မတည်းက သရေကျနိုင်တဲ့ ပုဇွန်ထုပ်ဟင်း ချက်ပြချင်ပါတယ်။ ခေါင်းပါတဲ့ပုဇွန်ထုပ်ကို ချက်စေချင်ပါတယ်။ ခေါင်းမှာပါတဲ့ ပုဇွန်ဆီနဲ့တွဲချက်မှသာ ပုဇွန်ထုပ်ဟင်းရဲ့ အရသာကိုပီပီပြင်ပြင် ရရှိနိုင်မှာပါ။ ဒီဟင်းချက်ရင်တော့ လက်နဲ့သာအားရပါးရ နယ်ဖက်စားလိုက်ပါနော်။

ဟင်းချက်နည်း

• ပုဇွန်ထုပ်ကိုကျောခွဲပြီး အညစ်အကြေးထုတ်ထားပါ။ ပြီးလျှင် ဆား၊နနွင်း၊အချိုမှုန့်၊ငံပြာရည် တို့နဲ့ နယ်ထားပါ။
• ချက်မယ့်အိုးထဲဆီထည့်၊ ပူလာရင် မဆလာထည့်၊ နုပ်နုပ်စဉ်းထားတဲ့ ကြက်သွန်ဖြူ၊နီ၊ခရမ်းချဉ်သီး တို့ကိုထည့်ပြီး ဆီသက်ပါ။နွမ်းစပြုလာရင်ငရုပ်စိမ်းမှုန့်ထည့်ဆီသက်ပါ။
• ထိုနောက် ရေနည်းနည်းချင်းထည့်ကာ အနှစ်ကြေတဲ့အထိတည်ပါ။
• အနှစ်ကြေပါကပုဇွန်ထည့် ပြီးလုံးပါ။ တဘက်ကျက်လျှင်တဘက်ကိုအသာလှန်ပေးပါ။
• ရေကိုနည်းနည်းချင်းထည့်ပြီးကျက်တဲ့အထိတည်ပါ။ ချခါနည်းမှာအပေါ့အငံမြည်းကာ ခရုဆီရှိပါက အနည်းငယ်ထည့်ပေးပါက ပုဇွန်ထုပ်ဟင်းကို ပိုမိုအရသာရှိစေပါတယ်။ ဒါဆိုရင်တော့ အနံ့ရရုံနဲ့ သရေကျနိုင်မယ့် ပုဇွန်ထုပ်ဟင်းရပြီပေါ့။

အစာပြေမုန့်လုပ်စားကြမလား?

အဝေးရောက်နေတဲ့အခါ မြန်မာမုန့်ဝယ်စားဖို့အလွန်ခက်ပါတယ်။ စားချင်ရင်တော့ ကိုယ့်ဘာသာ လုပ်စားမှပဲရပါတယ်။ ဒီစာမျက်နှာမှာတော့ ကျမစားချင်လွန်းလို့စမ်းလုပ်ကြည့်ရင်းကနေ ဖြစ်သွားတဲ့ မုန့်လုပ်နည်းလေးတွေကို ဖေါ်ပြပေးသွားပါမယ်။ အားလုံးပဲ အာသာပြေနိုင်ကြပါစေနော်။

ဆီထမင်းထိုးနည်း

ပါဝင်တဲ့ပစ္စည်းတွေက ကောက်ညင်းဆန် ၂ဘူး ကြက်သွန်နီ ၂လုံး ဂျင်း အနည်းငယ် ဆီ ၅ဇွန်း နနွင်း အနည်းငယ် ဆား ၁ဇွန်း

ပြုလုပ်နည်း

• ဒယ်အိုးထဲကို ဆီထည့်ပြီး ကြက်သွန်နီ၁လုံးပါးပါးလှီးထားတာကိုထည့်ကြော်ပါ။ အရောင်ရဲလာလျှင်ဆယ်ထားပါ။
• ပါးပါးလှီးထားတဲ့ဂျင်း၊နနွင်းထည့်ကျန်တဲ့ကြက်သွန်နီထည့်ပြီးဆီသက်ပါ။
• ပြီးလျှင် ရေဆေးပြီးစစ်ထားတဲ့ကောက်ညင်းဆန်ကို ထည့်လုံးပါ။
• ရေကိုကောက်ညင်းအပေါ်မှလက်၂သစ်လောက်ထိထည့်ပြီးအဖုန်းအုပ်ကာ မီးအလယ်အလက်နဲ့တည်ပါ။
• ပွက်လာလျှင်ဆားထည့်ပပါ။ရံဖန်ရံခါအဖုန်းဖွင့်ပြီး အထပ်အောက်မွေပေးပါ။
• ရေခန်းစပြုလာရင်မီး ကိုအနည်းဆုံးထားလိုက်ပါ။၅မိနစ်၁ကြိမ်လောက်အိုးကို လှည့်ပြီးနေရာပြောင်းပေးပါ။
• မနပ်သေးဘူးထင်ပါကရေနွေးနည်းနည်းဆီထည့်ပေးနိုင်ပါတယ်။
• ကောက်ညင်းနပ်ပါကဇွန်းနဲ့ဒယ်အိုးအောက်ခြေကိုလှန်ကြည့်ပြီး ဂျိုးအနေအထားအသင့်အတင့်ရပြီ ဆိုပါကမီးပိတ်လို့ရပါပြီ။

(ဆီထမင်းကို ပဲပြုပ်၊ကြက်သွန်အနီကြော်၊ငါးကြော်၊ငါးခြောက်ဖုတ်တို့နဲ့တွဲဖက်စားရင် အလွန်အရသာရှိပါတယ်။)

အိမ်ရှင်မများအတွက် japan တီဗီအစီအစဉ်ကပေးသော လွယ်ကူသက်သာ နည်းလမ်းအဖြာဖြာ

အိမ်ရှင်မတွေရဲ့အလုပ်ကို မလုပ်ကြည့်ဘူးဖူးဆိုရင် ဦးနှောက်မသုံး၊အားလည်းမသုံးပဲ လုပ်ရတဲ့အလုပ်မို့ သိပ်သက်သာတဲ့အလုပ်လို့ ထင်တဲ့သူတွေလည်း ရှိကောင်းရှိပါလိမ့်မယ်။ ကျမကတော့  တကယ်ကိုမလွယ်တဲ့အလုပ် လို့ဆိုချင်ပါတယ်။ အိမ်ထောင်ဦးစီးတယောက်ကို အိမ်အလုပ် တစိတ်တပိုင်းလောက်ကိုလက်တွေ့လုပ်ခိုင်းကြည့်လိုက်ပါ။ ဘယ်လောက်မလွယ်တဲ့အလုပ်ဆိုတာကို မျက်ဝါးထင်ထင် သိသွားပါလိမ့်မယ်။ ဦးနှောက်လည်း တကယ်သုံးရသလို အင်အားသုံးဖို့လည်း တကယ်ကို လိုအပ်ပါတယ်။

ညမအိပ်ခင်ကတည်းက မနက်အိပ်ယာထလုပ်ရမယ့် အလုပ်ကိုကြိုတင်တွေးတဲ့ အလုပ်ကစရ ပါတယ်။ တစ်လလုံးစာအတွက် ရတဲ့ဝင်ငွေကို ဘယ်လိုလောက်အောင်သုံးရမလဲဆိုတာကို တွက်ချက်ရတာကိုက　တကယ်မလွယ်တာပါ။　ကျမတို့တွေဟာမျက်စိနှစ်လုံးပွင့်ပြီဆိုတာနဲ့ ဝမ်းဟာတဲ့ပြဿနာကိုဖြေရှင်းဖို့ တနေ့တာစာ သုံးနပ်စာအတွက် ချက်ပြုပ်ရာကစလို့ မိုးလင်းရပါတယ်။ တဖန်စားပြီးပြန်ရင်လည်း မဆေးကြောလို့က မဖြစ်ပြန်ပါဘူး။ ပြီးရင်လျှော်ဖွတ်၊ သိမ်းဆည်း၊ သန့်ရှင်းရေး၊ဈေးဝယ်၊ ကလေးထိန်း စသည်စသည်ဖြင့် အမျိုးကိုစုံလို့ပါပဲ။ ဒါကြောင့်လည်း အိမ်ရှင်မတွေကို ကမ္ဘာကိုထုဆစ်တဲ့ လက်များပိုင်ရှင်ရယ်လို့ တင်စားကြရတယ် မဟုတ်ပါလား။

အလုပ်များတဲ့အိမ်ရှင်မတွေကိုကိုယ်ချင်းစာသော အားဖြင့်  ဂျပန်တီဗီကြည့်ရင်း သိလာရတဲ့ အချိန်တိုအတွင်းလွယ်ကူစွာနဲ့လူသက်သာစေတဲ့ နည်းလမ်းများကို မှတ်မိသလောက် ဖောက်သည်ချပေး ပါရစေနော်။ 

မီးဖိုချောင်ကိစ္စအဝဝ

ကြွေပန်းကန်လုံးအစွန်းချွတ်နည်း

• စွန့်ပစ်မယ့်　ကြက်ဥအကာကိုလုံးခြေပြီး　စွန်းတဲ့နေရာကိုအားဖြင့်　ပွတ်တိုက်လျှင်　အစွန်းများယူပြစ်သလိုကျွတ်သွားပါလိမ့်မယ်။
• ရေခြောက်အောင်သုတ်ထားတဲ့　ကြွေပန်းကန်ကို　ဂျုံမှုန့် ဖြင့်နာနာပွတ်ပေးရင်လည်း　အစွန်းကျွတ်နိုင်ပါတယ်။

ဒန်အိုးချီးချွတ်နည်း

• ပန်းသီးအခွံကို ချေးချွတ်မယ့်ဒန်အိုးထဲထဲ့ ပြုပ်ပါ။ ၁၅မိနစ်လောက်ပြုပ်ပြီးမီးပိတ်ပါ။ အေးလာလျှင်ထိုအခွံဖြင့် ပွတ်တိုက်ပေးပါက အရောင်ပြောင်လာပါလိမ့်မယ်။

မီးဖိုချောင်ကဆီချီးချွတ်နည်း

• ဆီချီးပေတဲ့နေရာကိုsprayဘူးထဲရေထဲ့ပြီးအနည်းငယ်ဖြန်းပေးပါ။ ပြီးလျှင်ဂျုံမှုန့်ဖြန်းပြီး အပေါ်မှအဝတ်ဖြင့် ပွတ်ပေးပါက ပြောင်သွားပါလိမ့်မယ်။

microwaveအတွင်းပိုင်းသန့်ရှင်းရေး

• orange အခွံ၅လုံးခန့်ကိုစက်ထဲထဲ့ပြီး  second 40 လောက်အပူပေးလိုက်ပါ။ အနံ့ဆိုးများ ကင်းစင်သွားပါလိမ့်မယ်။

အသားငါးကိုင်ထားတဲ့လက်အညှီနံ့ပျောက်အောင်လုပ်နည်း

လက်ကိုပွတ်ဆေးစဉ်မှာ စတီးရေပိုက်ခေါင်းကိုထိုလက်နဲ့ပွတ်တိုက်ပြီး ဆေးပေးပါက အညှီနံ့ပျောက်ကင်းသွားပါလိမ့်မယ်။

အသားအဆီများကိုကိုင်တဲ့လက်ကို စင်အောင်ဆေးကြောနည်းထား

• တခါတလေဘယ်လောက်ပဲဆပ်ပြာနဲ့ဆေးဆေး အသားရဲ့အဆီတွေ မစင်သလို ဖြစ်တတ်ပါတယ်။ ထိုအခါမျိုးမှာ သကြားဇွန်းအသေး၁ဇွန်းလောက် လက်ထဲထည့်နယ်ပါ။ ရေနဲ့လောင်းဆေးပြီး တဖန်ဆပ်ပြာဖြင့်ဆေးလိုက်ပါက ပြောင်သွားပါလိမ့်မယ်။

အနံ့အသက်ဆိုးများပျောက်ကင်းအောင်လုပ်နည်း

• ခြေသုတ်ဝတ်၊ကော်ဇောခင်း၊လိုက်ကာ အစရှိတဲ့ပစ္စည်းတွေမှာ အနံ့ဆိုးတွေကပ်နေတဲ့အခါ လျှော်ဖို့ မလွယ်တတ်ပါဘူး။ဒီနည်းဟာဆိုရင် အနံ့ပျောက်အောင်လုပ်ဖို့ရာမှာ အကုန်အကျသက်သာသလို လုပ်ရလွယ်ကူတဲ့နည်းပဲဖြစ်ပါတယ်။

• ဆော်ဒါ၁ဇွန်းလောက်ကို ရေနဲ့ဖျော်ပြီး စပရေးဘူးထဲထည့်ပြီး အနံ့ရှိတဲ့နေရာအနှံ့ကိုဖြန်းပေးပါ။ ဆော်ဒါက တခြားဓာတုပစ္စည်းများလို မပြင်းတဲ့အတွက်ကလေးငယ်တွေရှိတဲ့အိမ်တွေအတွက် အလွန်အသုံးဝင် ပါတယ်။

အုန်းနို့ခေါက်ဆွဲစားကြမယ်!

ဒီနေ့တော့ရုံးပိတ်ရက်လည်းဖြစ် ရာသီဥတုကလဲအေးဆိုတော့ မချက်တာကြားပြီဖြစ်တဲ့အုန်းနို့ခေါက်ဆွဲလေး ချက်စားဖြစ်ခဲ့ပါတယ်။ ပူလွန်းတဲ့အချိန်မှာစားရင် အခန့်မသင့်တဲ့အခါ ခေါင်းမူးတက်တာမို့ အသက်ကိုညဏ်စောင့်ဆိုတဲ့ ရှေးထုံးကိုတော့ လိုက်နာသင့်တယ်မဟုတ်ပါလား။

သွေးတိုးရှိရင်တော့ ပိုဆင်ခြင်သင့်တာပေါ့ရှင်။ စားချင်ရင်တောင် အရေနည်းနည်းကို ကြက်သွန်နီများများ၊ရှောက်သီးချဉ်ချဉ် ညစ်စားတာမျိုးစားတော့ အာသာလည်းပြေသလို ခန္ဓာကိုယ်ကိုလည်း ဂရုစိုက်ပြီးသားဖြစ်သွားတာပေါ့။ ကဲ အုန်းနို့ခေါက်ဆွဲ လေးချက်ကြည့်လိုက်ကြရအောင်နော်။


ပါဝင်တဲ့ပစ္စည်းများ(၁၅ပွဲစာ)

ကြက်သား	အကောင်သေးသေးတကောင်
ခေါက်ဆွဲ	၁ပိဿာ
အုန်းနို့	သံဘူးတဘူး(ready made)
နို့စိမ်း	၁လုံး
သကြား	၃ဇွန်း
ဆီ	၄ဇွန်း
ငံပြာရည်	အနည်းငယ်
ပဲမှုန့်စိမ်း	၁၀သား
ကြက်သွန်နီ	ဥကြီး ၂လုံး
ဂျင်း	လက်တသစ်
ကြက်သွန်ဖြူ	၂မွှာ
ငရုပ်စိမ်းမှုန့်	၂ဇွန်း
နနွမ်း	အနည်းငယ်
ဘဲဥ	၅လုံး
အကျွတ်ကြော်	အနည်းငယ်
ပဲကြော်	၁၅ခု

ချက်နည်း

• ကြက်ကိုရေဆေးပြီး ဂျင်းကြက်သွန်ဖြူဓားပြားရိုက်ပြီးဆား၊အချိုမှုန့်၊နနွမ်း၊ငံပြာရည် ထဲ့ကာ ရေတဝက်ခန့်အိုးထဲထဲ့ပြီး ပြုပ်ပါ။ဘဲဥပါပြုပ်ထားပါ။
• ကျက်လာလျှင်အအေးခံပြီး အသားမွထားပါ။အရိုးကိုဆက်ပြုပ်ထားပါ။
• ဒယ်အိုးထဲဆီထဲ့ပြီး ပူလာပါက ထောင်းထားတဲ့ကြက်သွန်ဖြူ၊ဂျင်း ကိုမွေးလာသည်အထိဆီသက်ပါ။ ပြီးလျှင်အစိမ်းမှုန့် ထဲ့မွေပြီးမွထားတဲ့ကြက်ကိုထဲ့ပြီးဆီသက်ပါ။ ရေကုန်ပြီးမွေးလာလျှင်ချထားပါ။
• ပဲမှုန့်အစိမ်းကိုရေဇလုံးထဲထဲ့ပြီး အခဲမကျန်အောင် ဖျော်ပြီး ဟင်းရေအိုးထဲလောင်းထဲ့ပါ။ ပဲမှုန့်ထဲ့ပြီးပါကမပြတ်မွေပေးဖို့လိုပါတယ်။ ပွက်ပါကလျံကျ တက်ပါတယ်။
• ပွက်လာလျှင် ဆီသက်ထားတဲ့ကြက်ကိုထဲ့၊ အုန်းနို့၊နို့စိမ်းပါထဲ့ပြီး ရေကိုအိုး၄ပုံ၃ပုံလောက်ထဲ့တည်ပါ။ (ဘဲသွေးကြိုက်ရင်ထဲ့နိုင်ပါတယ်)
• နာရီဝက်လောက်မီး အလယ်အလတ်လောက်နဲ့တည်ပြီးပါက ဆား၊သကြား၊အချိုမှုန့် အပေါ့အငံလို သလို ပြုပြင်ကာ  မီးအေးအေးနဲ့၁၅မိနစ်ခန့်ဆက်တည်ပြီး ချခါနီးမှာဘဲဥကိုပါးပါးလှီးထဲ့ပြီးပါက ဟင်းရေကျက်ပါပြီ။
• ကြက်သွန်စိမ်းကိုပါးပါးလှီးပြီးရေစိန်ထားပါ။စားမယ့်ပန်းကန်ထဲခေါက်ဆွဲထဲ့ ကာစားချင်တာတွေအားလုံးထဲ့ပြီး အရသာရှိရှိသုံးဆောင်နိုင်ပါပြီရှင်။

ကြက်သားနဲ့မလဲနိုင်တဲ့ချဉ်ပေါင်ဟင်း

ချဉ်ပေါင်ဟင်းအကြောင်းရေးမယ်ကြံတော့ ကျမတို့ငယ်ငယ်ကသင်ခဲ့ဘူးတဲ့ ရေသည်ပြဇာတ်ကို သွားသတိရမိပါတယ်။ ဆရာကြီးဦးပုည ရဲ့ပြောင်မြောက်တဲ့ရေးဟန်တွေကြောင့် ချဉ်ပေါင်ဟင်းနဲ့ တလုပ်ကယ်ဝဝစားလိုက်ရရင်ဖြင့်" ဆိုတဲ့အပိုင်းဖတ်တိုင်း သရေမဆယ်နိုင်ပဲဂလုဆိုပြီး အမြဲမျိုချ ခဲ့ရဖူးပါတယ်။

ချဉ်ပေါင်အကြောင်းဋီကာဖွင့်ရမယ်ဆိုရင်　"ရွှေချဉ်ပေါင်လက်ကြား　ကြက်သားနဲ့မလဲနိုင်　"　ဆိုတဲ့အဆိုလဲ　ကလည်းရှိထားတယ်မို့လား။　မြန်မာပြည်မှာရှိစဉ်ကတော့　ချဉ်ပေါင်ဟင်းကို　ကြိုက်တယ်ဆိုပေမယ့်　ဒီလောက်မမက်မောခဲ့ဘူး။　အဝေးရောက်မှပဲစားချင်လိုက်တဲ့　ချဉ်ပေါင်ဆိုတာ　ပြောမပြောချင်ပါဘူး။　ဂျပန်ကစူပါမားကပ် တွေမှာ ချဉ်ပေါင်က ဝယ်လို့မရဘူးလေ။ မြန်မာတွေ ဖွင့်ထားတဲ့ဆိုင်တွေမှာတော့ ရံဖန်ရံခါရတတ်ပါတယ်။

မနေနိုင်တဲ့ကျမကတော့စိုက်ပျိုးရေးလဲဝါသနာ ပါတာမို့ ရာသီဥတုနွေးလာရင် စိုက်ပြီးစားလိုက်တာပါပဲ။ ကိုယ်တိုင်စိုက်တဲ့အရသာဆိုတော့ ၂မျိုးအရသာ ခံစားနိုင်တာပေါ့လေ။ ကဲပြောနေကြာပါတယ်။　ခူးထားတဲ့ချဉ်ပေါင်လေးမနွမ်းခင်　အရသာရှိရှိ　ချက်ကြည့်လိုက်ကြရအောင်နော်။

အလွမ်းပြေ ချင်ပေါင်ဟင်းရည်

ပါဝင်ပစ္စည်းများ

ချဉ်ပေါင်	ဇကာတလုံးခန့်
မျှစ်	၅ကျပ်သား
ရုံးပတီ	၅တောင့်
ငရုပ်သီးစိမ်း	၅တောင့်
ပုဇွန်ခြောက်	အနည်းငယ်
ကြက်သွန်ဖြူ	၂မွှာ
ငပိ	အနည်းငယ်
ဆား၊အချိုမှုန်	အနည်းငယ်
ငံပြာရည်	အနည်းငယ်
ဆီ	ဇွန်းကြီး၂ဇွန်း
နံနံပင်	အနည်းငယ်
နနွင်း	ဇွန်းသေး၁ဇွန်း

ဟင်းချက်နည်း

• ချဉ်ပေါင်သင်ထားပါ။　ရုံးပတီသီးကိုစောင်းစောင်းလေးတွေလှီးပါ။　ကြက်သွန်ဖြူထောင်းထားပါ။
• ချက်မယ့်အိုးထဲကိုဆီထဲ့ပြီး　ဆီပူလျှင်　ကြက်သွန်ဖြူ၊နနွင်းထဲ့ပြီးဆီသတ်　။　ငပိနဲ့ပုဇွန်ခြောက်　　　ထဲ့ပြီးမွေပါ။
• ပြီးလျှင်　မျှစ်နဲ့ချဉ်ပေါင်ထဲ့လုံးပါ။ရေခမ်းပါကရေ　၃ဖန်ခွက်ထဲ့ပါ။
• ဆူပွက်ပြီး၁၅မိနစ်ခန့်ကြာလျှင်ရေအနေအထားကြည့်၊ဆား၊အချိုမှုန့်၊ငံပြာရည်ထဲ့ပြီးအပေါ့အငံမြည်းပါ။
• စိတ်ကြိုက်အနေအထားရပြီဆိုလျှင်　ရုံးပတီသီးနဲ့ငရုပ်သီးစိမ်းထဲ့ပြီး၂မိနစ်လောက်တည်ပါ။
• မီးပိတ်၊နံနံပင်အုပ်ပြီးလျှင်တော့　အငွေ့တထောင်းထောင်းနဲ့စားချင်စဖွယ်　ချဉ်ပေါင်ဟင်းတစ်ခွက်　ရပြီပေါ့။

အညာငရုပ်သီးဆာထောင်း　ဒါမှမဟုတ်　ငပိထောင်းစပ်စပ်လေးနဲ့ တွဲစားရင်တော့　အလွန်မိန်မှာမို့　ထမင်းပိုချက်ထားဖို့တော့ သတိပေးပါရစေနော်။

ချဉ်ပေါင်ကြော်စားကြမလား

ချဉ်ပေါင်းဟင်းပြီးတော့ တလက်စတည်းချဉ်ပေါင်ကြော်နည်းလေးပါ တင်ပြလိုက်ရပါတယ်။

ပါဝင်တဲ့ပစ္စည်းတွေက ချဉ်ပေါင် ၃စီး ပုဇွန် ၁၅ကျပ်သား မျှစ် ၁၀သား ငရုပ်သီးစိမ်း ၁၅တောင့် ငရုပ်ခွဲကြမ်း ၂ဇွန်း ငပိ ဇွန်းသေး၁ဇွန်း ငံပြာရည် ၁ဇွန်း အချိုမှုန့် ဇွန်းသေး၁ဇွန်း ဆား အနည်းငယ် ဆီ ၅ဇွန်း နနွင်း အနည်းငယ် ကြက်သွန်ဖြူ ၂မွှာ

ချဉ်ပေါင်ကြော်နည်း

• ချဉ်ပေါင်ကိုရေဆေးပြီးဆားနဲ့နယ်ကာအချွဲပြောင်ရေဆေးထားပါ။
• ကြော်မယ့်အိုးထဲကိုဆီထည့်ပြီးပူလာပါက ထောင်းထားတဲ့ကြက်သွန်ဖြူ၊နနွင်း၊ငပိ ထည့်ပြီး ဆီသက်ပါ။
• အစိမ်းနံ့ပြောက်ပါက မျှစ်၊ငရုပ်ခွဲကြမ်းနဲ့ပုဇွန်ကို ရောထည့်ပြီး ရေခြောက်အောင်လုံးပါ
• ဆီပြန်ပါက ချဉ်ပေါင်ထည့်၊ ငံပြာရည်၊အချိုမှုန့်ကိုထည့်ပြီး ကြော်ပါ။
• ရေကုန်ပြီးချဉ်ပေါင်ကျက်ပြီဆိုပါက အပေါ့အငံမြည်းကာ ချခါနည်းမှာ ငရုပ်သီးစိမ်းအုပ်ပြီးပြီဆိုရင် မီးပိတ်လို့ရပါပြီ။

ခြောက်ခြောက်လေးကြော်ထားရင် ကြာရှည်ခံပါတယ်။ ကျမအိမ်မှာကြော်ရင်တော့ အမျိုးသားရဲ့ အကြိုက်ဆုံးဟင်း မို့လို့ နောက်ရက်စာကို သူမမြင်အောင်ဖွက်ထားမှပဲ ရပါတယ်။

ဒီနေ့ချက်ဖြစ်တဲ့ဟင်းတခွက်

ဒီခေါင်းစဉ်အောက်မှာကျမစိတ်ကူးရပြီးချက်ဖြစ်တဲ့ဟင်းတွေကိုချက်နည်းနဲ့တကွဖေါ်ပြသွားမှာပါ။ ဘာချက်စားရင်ကောင်းမှန်းမသိတဲ့အခါ ဒီpostလေးကိုဖတ်ပြီး ထမင်းမိန်ပါစေလို့ဆန္ဒပြုလိုက်ရပါတယ်။

၁။ကြက်ပဲဟင်း

 ပါဝင်မယ့်ပစ္စည်းများ
အရိုးပါကြက်    ၁ကောင်                                 ဂျင်း             လက်တသစ်
ကုလားပဲ         ၅ကျပ်သား                             ကြက်သွန်ဖြူ          ၂မွှာ
ဆီ                 ဇွန်း၃ဇွန်း                               ငံပြာရည်               ဇွန်း၁ဇွန်း
ဆား              အနည်းငယ်                            မဆလာ                အနည်းငယ်
ဟင်းခတ်မှုန့်    အနည်းငယ်                            နနွင်း                  အနည်းငယ်       
အရောင်တင်မှုန့်  အနည်းငယ်                           

၁။ ပထမဦးစွာကြက်ကိုအရွယ်တော်တုန်းပြီးဆား၊ နနွင်း ၊ငံပြာရည်၊ ဟင်းခတ်မှုန့်တို့နဲ့သမအောင်နယ်ထားပါ။
၂။ ကုလားပဲကိုတရက်ကြိုရေစိမ်ထားပြီးဟင်းမချက်ခင်ကြိုပြုပ်ထားပါ။
၃။ ဂျင်း၊ကြက်သွန်ဖြူကိုညက်အောင်ထောင်းပါ။
၄။  ချက်မယ့်အိုးထဲကိုဆီထဲ့ပြီးပူလာလျှင် <၃>ကိုထဲ့မွေပါ။
၅။ပြီးလျှင်အရောင်တင်မှုန့်ထဲ့ပြီးစိမ်းနံ့ပျောက်လျှင်နယ်ထားတဲ့ကြက်ကိုထဲ့ပါ။
၆။ကြက်ကိုရေကုန်တဲ့အထိလုံးပါ။ရေကုန်လျှင်ပဲထဲ့ပြီးရေလက်ဖက်ရေခွက်၂ခွက်ထဲ့ပြီးဆူအောင်တည်ရပါမယ်။
၇။ကြက်သားမနူးလျှင်ရေထပ်ထဲ့ပြီးနူးသည်အထိတည်ပါ။
၈။ကြက်သားနူးပြီးရေအနေတော်ရပါကအပေါ့အငံလိုသလိုထဲ့ပြီးနောက်ဆုံးမှာမဆလာခတ်ပြီးသုံးဆောင်နိုင်ပါပြီ။

ဝက်နံရိုးနဲ့ကျောက်ဖရုံအရေသောက်

ဝက်နံရိုး              ၅၀သား
ကျောက်ဖရုံသီး      ၁ခြမ်း
ကြက်သွန်ဖြူ        ၂မွှာ
ဂျင်း                  လက်တသစ်
ဆား                   အနည်းငယ်
အချိုမှုန့်              အနည်းငယ်
ပဲငံပြာရည်           ၁ဇွန်း
ငရုပ်ကောင်း         အနည်းငယ်

ခရမ်းချဉ်သီးပန်ထရေဖျော်

ခရမ်းချဉ်သီး         ၂လုံး
ငရုပ်စိမ်း             ၅တောင့်
ကြက်သွန်ဖြူ         ၃မွှာ
နံနံပင်              အနည်းငယ်
ဆား               အနည်းငယ်
အချိုမှုန့်           အနည်းငယ်


ဒီဟင်းလေးဟာချက်ရတာ အလွန်လွယ်ကူပြီးစားရာမှာလည်း အလွန်ခံတွင်းတွေ့တဲ့ဟင်းလို့ ဆိုရင် မှားမယ်မထင်ပါဘူး။ကျမတို့အိမ်မှာတော့ အဖေကြိုက်တဲ့ဟင်းမို့ အမေကအမြဲလိုလိုချက်လေ့ရှိပါတယ်။ အလုပ်ရှုတ်လို့ ဘာချက်ရမှန်းမသိရင် ဒီဟင်းလေးချက်ကြည့်လိုက်ပါ။ အရည်လေးသောက်စားဆမ်းစားပြီး ဝက်နံရိုး နူးနူးလေးကို ခရမ်းချဉ်သီးပန်ထရေဖျော်လေးနဲ့တို့စားရင်း ကျမကိုသတိရလိုက်ပါနော်။

ဟင်းချက်နည်း

• ဝက်နံရိုးကိုအရွယ်တော်တုန်း။ကျောက်ဖရုံသီး အခွံခွာပြီး ၁လက်မတုန်းလောက်တုန်းထားပါ။ကြက်သွန်ဖြူထောင်း၊ဂျင်း ကို ဓားပြားရိုက်ထားပါ။

• ချက်မယ့်အိုးထဲကို ကြက်သွန်ဖြူ၊ဂျင်း၊ဝက်နံရိုး၊ပဲငံပြာရည် ထည့်၊ပြီးလျှင် ရေမြှုပ်အောင်ထည့်ပြီးတည်ပါ။
• ပွက်လာလျှင်ကျောက်ဖရုံသီးထည့်ပါ။

• ရေခန်းပါကထပ်ဖြည့်ပြီး ဝက်နံနူးတဲ့အထိတည်ပြီးပါကချခါနည်း မှာ ဆား၊အချိုမှုန့် လိုသလိုထည့်ပြီး ငရုပ်ကောင်းခတ်ခါ သုံးဆောင်နိုင်ပါပြီ။ 

(ခရမ်းချဉ်သီးကိုမီးအေးအေးနဲ့ အိတဲ့အထိမီးကင်ပါ။ အပေါ်ကအခွံကိုခွာပြီး လက်နဲ့ခြေထားပါ။ ပြီးလျှင် ငရုပ်သီးစိမ်းနဲ့ကြက်သွန်ဖြူရောထောင်းပြီး ဆား၊အချိုမှုန့်လိုသလိုထည့်ကာ ရောမွေပါ။ နံနံပင်အုပ်ပြီးလျှင် တော့ ခရမ်းချဉ်သီး ပန်ထရေဖျော် ရပါပြီ)

ကလေးဆိုတာတကယ်တော့ကလေးပါပဲ

သားလေးဟာအခုဆိုတနှစ်နဲ့သုံးလပြည့်သွားပါပြီ။ သူကိုကြည့်ရင်း တတ်တာသိတာတွေ များလွန်းတော့ တခါတခါ လူကြီးဖြစ်ပြီ ဆိုတဲ့အတွေးမျိုး ဝင်လာမိပါတယ်။ အလုပ်တွေများလို့ စိတ်ရှုပ်တဲ့အခါမျိုးမှာ ကလေးကဂျီကြလာရင် ဆူမိတာတွေရှိလာတတ်ပါတယ်။

မှပဲကိုယ့်ကိုယ်ကိုပြန်သုံးသပ်ရင်းငါမှားနေတာပဲ။ ကလေးက အခုအချိန်မှာ အားလုံးကို စူးစမ်းချင်တာကြောင့် သူဆန္ဒတွေ စကားလုံးများနဲ့ မဖော်ပြနိုင်ရှာတော့ သူတတ်နိုင်တာနဲ့ ဖော်ပြနေတာပဲ။

သားလေးကိုဆူပြီးမှ အပြင်ကိစ္စကိုအပြင်မှာထားပြီး သူစိတ်ဝင်စားတာ သူလုပ်ချင်တာလေးတွေကို ဦးစားပေးဖို့ သတိဝင်လာပါတယ်။

အခုလိုအခါမျိုးမှာလဲ ကျမအမေကို တမိပါတယ်။ တယောက်ထဲ မွေးထားပြီးမနိုင်ဖြစ်နေတာ အမေဆို၄ယောက်တောင်မွေးခဲ့တော့ ပိုပင်ပန်းရှာမှာပဲ ဆိုပြီးတော့ပေါ့။　

ဒီအချိန်မှာ အကိုင်အတွဲမှားရင် ကလေးစိတ်မှာ အနာရသွားနိုင်ပါတယ်။ အန္တရယ်ဖြစ်နိုင်တာမျိုး ဆိုရင်လဲ သေသေချာချာ နားလယ်အောင် ပြောပြဖို့လိုတာပေါ့။ တခါက ဂျပန်ပညာပေး အစီစဉ်တခုမှာ မိဘတွေရန်ဖြစ်ရင်　ကလေးတွေ ရှေ့မှာမဖြစ်ရဘူး လို့ဆိုထားပါတယ်။ နုနယ်တဲ့က လေးတွေအသိမှာ မိဘရင်ခွင်သာ နားခိုရာမို့ အေးချမ်းတဲ့အရိပ်တခု အဖြစ် အမြဲရှိနေသင့်ပါတယ်။ ဒီအရွယ်ကလေးတွေဟာ မှတ်ညဏ်အကောင်းဆုံး အရွယ်ဖြစ်တာကြောင့် သေချာလေ့ကျင့်ပေးရင်ထူးချွံတဲ့ကလေးဖြစ်လာမှာ မလွဲနိုင်ပါဘူး။

ကလေးတွေဟာ မိဘတွေကိုကြည့်ရင်း ကြီးပြင်းကြတာဆိုတော့　သူတို့ရှေ့မှာ တတ်နိုင်သလောက် အမှားမလုပ်မိဘို့ အရေးကြီးတယ်လို့ထင်ပါတယ်။ ကျမကတော့သားလေးကို ငယ်စဉ် အခါပျော်စရာကောင်းတဲ့ မိသားစုဘဝလေးကို သူအနာဂတ်အချိန်အထိ အမှတ်ရနေစေဖို့ပဲ မျှော်လင့်ထားပါတယ်။ သားလေး ကျန်းကျန်းမာမာ၊ ပျော်ပျော်ရွှင်ရွှင်နဲ့ သဘာဝအတိုင်းကြီးပြင်းလာဖို့လဲ　ကြိုးစားရပါအုံးမယ်။ ကလေးလေးတွေဟာ ကလေးလေးတွေပဲလို့မြင်ပြီး ဆက်ဆံဖို့လဲ ကျမကိုယ်ကျမ　သတိပေးရင်း အဆုံးသက်လိုက်ရပါတယ်　။　　　　။